Դրամաշնորհների փակ մրցույթ լրատվամիջոցների և հասարակական կազմակերպությունների համար

«Իրազեկ քաղաքացիների միավորումը» հայտարարում է դրամաշնորհների փակ մրցույթ լրատվամիջոցների և հասարակական կազմակերպությունների համար։  Մրցույթի նպատակն է խթանել պետական գնումների ոլորտում հաշվետվողականության բարձրացումն ու հանրային վերահսկողությունը։

Մրցույթն իրականացվում է «Պետական գնումների հանրային վերահսկողության և հաշվետվողականության խթանում» ծրագրի շրջանակներում, որի նպատակն է ամրապնդել հանրային վերահսկողությունը պետական գնումների համակարգում և խթանել գործընթացների թափանցիկությունն ու հաշվետվողականությունը։  Ծրագիրն իրականացվում է Միացյալ Թագավորության միջազգային զարգացման աջակցության շրջանակում ՄԹ կառավարության աջակցությամբ։

Ծրագիրը շեշտադրում է գնումների համակարգում առկա խնդիրների  վերհանումը (օրինակ՝ մոնիթորինգի, հետազոտության կամ հետաքննությունների տեսքով)՝ առաջարկելով հետևյալ թեմաները և դրանց հնարավոր համադրությունը.

• կոռուպցիոն ռիսկեր պարունակող գնումներն ու դրանց փոխկապակցվածությունը պաշտոնատար անձանց հետ,

• գնման հայտերի ու տեխնիկական առաջադրանքների միջոցով հակամրցակցային պայմանների առաջադրումը,

• հանձնման-ընդունման գործընթացում առաջացած խնդիրները ու գնումների անորակ արդյունքների բարձրաձայնումը,

• պատվիրատուների կողմից պայմանագրի կատարման հսկողության հետ կապված խնդիրները,

• գնումների պլանավորումից մինչև պայմանագրի կնքում ճանապարհին առաջացող օրենսդրական և ոչ օրենսդրական այլ խոչընդոտները,

• գնումների թափանցիկության հետ կապված խնդիրները:

Կողջունվեն համայնքային գնումների գործընթացին առնչվող, ինչպես նաև երիտասարդներից բաղկացած խմբերի հայտերը:

Դիմորդները պետք է համապատասխանեն հետևյալ չափանիշներին․

• առցանց ներկայություն՝ գործող կայք, ներգրավվածություն սոցցանցերում,

• լրատվամիջոց լինելու դեպքում էթիկայի մեխանիզմների առկայություն և/կամ մասնակցություն ԶԼՄ-ների ինքնակարգավորման նախաձեռնություններին,

• ակնկալվող ծրագրում ներգրավված անդամներից՝

1. 1. մեկը պետք է մասնակցած լինի 2025 թվականի հունիսի 21-22-ը «Իրազեկ քաղաքացիների միավորման» կազմակերպած «Պետական գնումների օրենսդրության զարգացումը և վերահսկողության մեթոդները» թեմայով սեմինար-թրեյնինգին,
   2. մեկը պետք է լինի «Իրազեկ քաղաքացիների միավորում» ՀԿ-ում պետական գնումների վերաբերյալ վերապատրաստում անցած երեք ուսումնառուներիցմեկը (նրանց CV-ները կից են):

Դրամաշնորհի տևողությունը և բյուջեն

Դրամաշնորհային ծրագրերի առավելագույն տևողությունը 4 ամիս է (2025 թ. հուլիսի 20-ից նոյեմբերի 20-ը), դիմելու վերջնաժամկետը` 2025 թվականի հուլիսի 7-ը (ներառյալ)։ Յուրաքանչյուր ծրագրի բյուջե չի կարող գերազանցել 3.9 միլիոն ՀՀ դրամը։

Մրցույթին դիմելու կարգը 

Ծրագրին մասնակցելու համար անհրաժեշտ է ներկայացնել հետևյալ փաստաթղթերը.

1. լրացված հայտադիմում (ձևանմուշը կարող եք ներբեռնել հետևյալ հղմամբ),
2. ծրագրի մանրամասն բյուջե (ձևանմուշը կարող եք ներբեռնել հետևյալ հղմամբ),
3. կազմակերպության գրանցման վկայականի լուսապատճենը,
4. վերջին երեք տարում իրականացրած ծրագրերի ցանկը` նշելով աջակցություն տրամադրած կազմակերպության անվանումը, ծրագրի տևողությունը և բյուջեն,
5. լրատվամիջոց լինելու դեպքում՝ էթիկայի մեխանիզմների առկայության կամ ինքնակարգավորման մարմնի անդամակցության ապացույց:

Վերջնաժամկետ և կոնտակտներ 

Հայտի ամբողջական լրացված փաթեթը խնդրում ենք ուղարկել [email protected] հասցեին։ Մրցույթին դիմելու վերջնաժամկետն է 2025 թվականի հուլիսի 7-ը (ներառյալ):

Յուրաքանչյուր դիմորդ կարող է ներկայացնել միայն մեկ հայտ: Կազմակերպչական հարցերի դեպքում խնդրում ենք գրել [email protected] հասցեին։

Ընտրության չափանիշներ և արդյունքներ 

Մրցույթին ներկայացված հայտերը գնահատելու և ընտրելու նպատակով ԻՔՄ-ն ձևավորելու է ընտրող հանձնաժողով։ Մասնակցության հայտերը կգնահատվեն ըստ ծրագրի նկարագրության, տեխնիկական, ստեղծագործական չափանիշների, իրատեսականության և առաջարկվող բյուջեի։

«Պետական գնումների օրենսդրության զարգացումը և վերահսկողության մեթոդները» թեմայով 2025 թ․ հունիսի 21-22 կայացած սեմինար-թրեյնինգին մասնակցած անձ չներառող կամ ԻՔՄ-ում պետական գնումների մոնիտորինգի վերապատրաստում անցած անձ չներառող հայտերը չեն դիտարկվելու:

Հաշվի կառնվեն՝

• հայտի համապատասխանությունը, ներկայացված տեղեկությունների ամբողջականությունը, գործողությունների տրամաբանությունը, իրագործելիությունն ու ռիսկերի գնահատումը,
• ծրագրի բովանդակությունը, թեմաների արդիականությունն ու ստեղծագործական մոտեցումը, կառուցվածքը, ձևաչափը, առաջարկվող մեթոդաբանության համապատասխանությունը, լրատվամիջոցների դեպքում` նյութերի քանակն ու ընթերցումների կամ դիտումների կանխատեսվող քանակը,
• համապատասխան մասնագետների ներգրավվածությունը նախագծի իրականացման համար, այլ բաղադրիչների/ռեսուրսների առկայությունը,
• ծրագրի վրա աշխատողների շրջանում սեռերի հավասար ներկայացվածությունը,
• առաջարկվող ֆինանսական միջոցների և ժամկետների համապատասխանությունը ծրագրի բյուջեին և գործողություններին:

Մրցույթի չափանիշներին համապատասխանելուց բացի՝ լրատվամիջոցների դեպքում գնահատող հանձնաժողովը դիտարկելու է նաև լրատվամիջոցի խմբագրական անկախությունը, լրագրողական էթիկական չափանիշներին հետամուտ լինելը, ինչպես նաև ծրագրի թիմի հետ համագործակցության,  փորձագետների հետ աշխատելու պատրաստակամությունը։

ԻՔՄ-ն ընտրական հանձնաժողովի հանձնարարությամբ կարող է առաջարկել դիմորդներին փոփոխություններ կատարել հայտերում, բյուջեում: Լրատվամիջոցի/ՀԿ-ի ներկայացուցիչը կարող է հրավիրվել լրացուցիչ հարցազրույցի։